TAMKO: Kukemea Ndoa Za Utotoni.

Shirika la Life Care Foundation (LCF) limepokea kwa masikitiko makubwa taarifa ya kuruhusu Mijadala iliyokuwa ikiendelea hivi karibuni, inasema mtoto mwenye miaka 11, 12 au 13 aliyeingia kipindi cha balehe aruhusiwe kuolewa kwa amri ya Mahakama kwa kuzingatia vielelezo vya kimazingira ikiwamo afya, imani, mila na desturi za jamii husika jambo ambalo linamnyima haki zake za msingi mtoto wa kike. Ndoa kuanzia miaka 13 kwa wasichana, Umri huu  ni hatari sana kwa mwanamkekwenye maswala ya uzazi kwa afya ya Mama na mtoto , kwa sababu msichana mwenye umri wa miaka 13 anakuwa hajakomaa kimaumbile, kiakili na maswala ya kijamii katika kulea mtoto.

LCF inaainisha madhara ya ndoa za utotoni ikiwemo Kuongezeka kwa vifo vya mama na mtoto, Upotevu wa damu nyingi wakati wa kujifungua na baada ya kujifungua, Kuongezeka kwa idadi kubwa ya watoto wa mtaani, Kuongezeka kwa watoto yatima, utupaji wa watoto na utoaji wa mimba usiosalama, kupata maambukizi ya Virusi vya Ukimwi na magonjwa ya zinaa, kunyanyasika kisaikolojia, kimwili na kijinsia kwa mabinti wengi kufanyiwa ukatili.

LCF inatoa lai/ombi kwa serikali na katiba ya nchi kuweka Sheria ya ndoa  kuanzia miaka 18, kwani katika umri huu msichana anakuwa anajielewa , anajua elimu ya maisha na ya kijamii juu ya kulea mtoto kuliko wasichana wenye umri chini ya miaka 18. Jamii itambue na kulinda haki za msingi za mtoto wa kike na kujiepusha na mila na desturi zilizopitwa na wakati.

Pia LCF inarejea kwenye mpango mkakati wa sera ya afya ya 2017 ambayo sehemu kubwa ililenga kupunguza vifo vya mama na mtoto kwa kukemea ndoa za utotoni.
 
Imetolewa Leo Tarehe 30/3/2023 na:
Life Care Foundation
 
 

Bi.Victoria Y. Masinga
Mkurugenzi Mtendaji.